JAPAN – Nagtapos ang pagsinapol ni Presidente Rodrigo Duterte sa Filipino Community sa Japan sa pag-imbitar sang mga babayi sa stage agud nga maghalok sa iya.
Ang apat ka mga babayi nga nagsaka sa stage ang palareho sang lawas, supat, kataason kag may manami nga buhok.
Ginpamangkot ni Presidente Duterte ang mga kababaihan kun may yara na sang bana ang mga ini kag kun legal na ang ila edad.
Sa pagsinapol, kaupod sang Presidnete ang mga Cabinet members, si Senator elect Bong Go kag amo man ang iya common law wife nga si Honeylet Avanceña nga nagalantaw lamang sa iya samtang ang mga babayi ang nagasaka sa stage agud nga maghalok sa iya.
Sa una nga babayi, daw kaangay nga wala ini nakahibalo kun sa bibig ukon sa nawong siya mahalok kay Duterte apang ginhalokan sang presidente sa iya nawong.
Sa ikaduha nga babayi, ginhalokan man siya sang Presidente sa nawong kag nagpasalamat pa ini antes manaog sa stage.
Ang ikatatlo naman nga babayi ang nagpresentar sang iya nga nawong agud nga halukan sang Presidente kag nagpa picture pa ini samtang ginakaptan ang iya kamot sang Presidente.
Sa ika-apat nga babayi, natigayon man nga sa nawong ini nahalukan ni Duterte.
Kag wala pa diri nagtapos ang paghalok ni Duterte sa mga babayi bangud nagpanawagan pa ini sa mga byuda nga luyag maghalok sa iya.
Isa ka babayi ang nagtindog kag ginhalokan sang Presidente sa iya man nawong.
Liwat pa nga nagpanawaan si Duterte kun sin-o pa ang luyag nga magpahalok sa iya apang wala na sang may nagpalapit pa sa stage.
Nahibaluan nga ginapakamalaot sang women’s rights groups kag pila ka mga mamalidha ang pagtrato ni Presidente Duterte sa mga babaye ilabi na sang nagbisita ini sa South Korea sa diin iya ginhalokan sa bibig sang isa ka babaye.
Apang depensa sang Malacañang, ang ginahimo sang presidente amo lamang nga makapakadlaw siya sa mga tawo.
