ILOILO – Gin-aprubahan na sang Sangguniang Panlalawigan sa probinsya sang Iloilo ang 2019 annual budget.
Sa session nga ginpatigayon sa Iloilo Provincial Capitol sa pagpanguna ni Iloilo Vice Governor Christine Tingting Garin, ginpaboran sang mga board members nga ipasar na ang 2019 budget matapos ang malawig nga tion.
Ang pondo nga natalana para sa General fund ang nagabalor sang P2.6 billion samtang P946,797,000 naman ang para sa Local Economic Enterprise.
Nagakadapat nga P2.7 billion kuntani ang General Fund apang bangud sa mga ginpang-slash nga item nabuhinan ini kag nangin P2.6 billion na lamang.
Samtang ginkumpirma naman ni Liga ng mga Barangay President Dorothy Paes nga amo ang Chairperson sang Committee on Appropriations nga aprubado na ang budget sang probinsya.
Apang ginbuhinan sang Sangguniang Panlalawigan ang pondo sang Hospital and Management Office (HMO), Public Information and Community Affairs Office (PICAO) kag Governor’s Office rason nga nagnubo ang general fund sang probinsya.
Nahibaluan nga makapila ka beses nagpatigayon sang budget hearing ang Sangguniang Panlalawigan umpisa sang Disyembre 2018 apang subong lamang natigayon nga ma aprubahan.
