ILOILO – Mapaanggid sa isa ka teleserye ang sunod-sunog nga pagbuyagyag ni Peter Joemil Advincula alyas Bikoy tuhoy sa mga tawo nga yara sa likod sang ang ‘Totoong Narco-list’ videos.
Ini ang kasunod sang panibag-o na naman nga akusayson ni Bikoy sa diin iya gin-angot sa pagpaguwa sang ‘Totoong Narco-list’ videos sanday Lingayen-Dagupan Archbishop Socrates Villegas, Caloocan Bishop Pablo Virgilio kag anay Department of Education (DepEd) Secretary Armin Luistro.
Sa interview sang Bombo Radyo kay Atty. Noel Palomado, isa sa mga Bombo Abogado, iya ginpahayag nga bisan siya ang natingala man sa pabag-o bag-o nga pahayag ni Bikoy.
Ginpahayag ni Palomado nga sang una, gin-ulamid ni Bikoy si Presidente Rodrigo Duterte kag ang iya pamilya, sunod naman amo sanday Sen. Antonio Trillanes IV kag ang Liberal Party kag sa subong, panibag-o na man nga mga tawo ang naangot sa illegal drug trade sa pungsod.
Sa pagpaathag ni Palomado, daku nga palamangkutanon sa publiko ang ginapangbuy-an nga pahayag ni Bikoy nga mapaanggid sa isa ka teleserye nga may panibag-o nga sugpon.
Sa pihak sini, nagapati naman ang abogado nga bisan makapila pa nga magbag-o ang pahayag ni Bikoy, maggaguwa gid ang kamatuoran.
