ILOILO CITY – Desidido ang Department of Health (DOH) nga matapna ang pagduging sang Dengue sa Western Visayas.
Ini ang kasunod sang ginpatigayon nga Association of Southeast Asian Nations (ASEAN) Dengue Day 2019 sa diin nagserbe nga host ang syudad sang Iloilo.
Ang nasambit nga aktibidad ngamay tema nga “End Dengue: Starts with me” ang gintambungan sang mga estudyante, ginikanan, manunudlo kag iban pa nga stakeholders.Sa interview sang Bombo Radyo kay Dr. Rose Marie Lamirez, Medical Officer IV sang Department of Health (DOH) – Center for Health Development (CHD) 6, iya ginpahayag nga ang Dengue ang indi lamang problema sa Western Visayas kundi ini ang problema man sa bug-os nga Pilipinas kag iban pa nga pungsod.
Sa ginpatigayon nga kahiwatan, ginpahayag ni Lamirez nga nangin dinapit nga bisita si Iloilo City Councilor Candice Tupas kag iban pa nga Provincial kag City Health Officer sa rehiyon.
Natigayon nga mapasar ang ordinansa nga nagamandu sa tagsa ka lugar nga magpatigayon sang pagpaninlo sa tagsa ka semana agud nga wala sang pugaran ang lamok.
Kun basehan suno kay Lamirez ang datus sang DOH, nagsaka sa 9,235 ang kaso ang Dengue sa rehiyon kag naglab-ot naman sa 55 ang patay.
Nagalaum naman ang natungdan nga nahangpan sang mga nagtambong ang gin-itoryahan nga topiko tuhoy sa “4S” strategy nga nagakahulugan sang search and destroy mosquito breeding places, secure self-protection, seek early consultation kag support fogging.
