ILOILO CITY – Ginahulat pa sang Land Transportation Office (LTO) 6 ang pag-abot sang breath analyzer gikan sa LTO central office bag-o mapatuman ang Republic Act 10586 ukon Anti-Drunk and Drugged Driving Act.
Sa interview sang Bombo Radyo kay Atty. Allan Sacramento, legal counsel kag pinuno sang Operations Division sang LTO-6, iya ginpahayag nga may yara na sang deputized agents ang LTO kasubong sang mga pulis kag ang personnel sa idalom ang Public Safety and Transportation Management Office (PSTMO).
Ugaling suno kay Sacramento, indi pa mapatuman sang husto ang RA 10586 bangud nga ang mga breath analyzer ang ginapaidalom pa sa calibration sa LTO central office kag ginalauman nga maga-abot subong nga Hunyo ukon sa masunod nga bulan.
Santo sa RA 10586, kun may yara sang aksidente ilabi na kun may yara sang napilasan ukon napatay, mahimo nga paakaan sang kaso ang violator kun mapamatud-an nga hubog ukon nakagamit ang illegal drugs paagi sa mandatory alcohol and chemcial test gamit ang breath analyzer.
Kun basehan naman ang Republic Act 4136 ukon Land Transportation and Traffic Code sa pagpasaka sang kaso, ang hospital ukon laboratory result ang gamiton nga ebidensya sa pagpasaka sang kaso.
Bisan indi mandatory apang mahimo sa gihapon nga ipaidalom sa alcohol and chemical test ang violator.
