ILOILO CITY – Nagapadayon ang traffic adjustment sang Public Safety and Transportation Management Office (PSTMO) sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Mr. Jeck Conlu, pinuno sang PSTMO, iya ginpahayag nga ginpasirado na ang u-turn slot malapit sa pedestrian lane sa diin nabunggu-an patay sang Mazda MX5 sports car ang mag-asawa nga Joe Marie kag Alnie Dinah Osano.
Suno kay Conlu, magluwas sa pagpasirado sang u-turn slot kag pagpahamtang sang traffic road signages kag rumble strips, gina amat-amat na ang inventory tuhoy sa mga pedestrian lane nga pagakuhaon sa nasambit nga dalan nga mas kilala nga Diversion Road.
Ini bangud nga suno kay Conlu, ang Diversion Road ang makabig nga open highway kag nagakadapat nga wala sang ‘obstruction’ sa dalan.
Sa baylo nga pedestrian lane, mas makapaayo suno kay Conlu nga magpahamtang sang overpass ukon underpass apang nagakinahanglan ini sang daku nga pondo.
Nagpahayag naman si incoming Iloilo City Mayor-elect Jerry Treñas nga pagabutangan sang signaling system sa diin ang mga magatabok sa pedestrian lane ang may yara sang pagapinduton nga ‘button’ agud nga makahatag sang signal ang traffic lights sa mga motorista.
Ginaduso man ang pagpaidalom sa mga traffic violator sa seminar bag-o makakuha ukon magawad ang ila lisensya.
Sa subong, ginakabig sang PSTMO nga daku nga pagpanghangkat sa ila kun paano mapatuman ang traffic adjustment ilabi pa nga ang iban sa motorista ang wala sang disiplina.
