ILOILO CITY – Ginklaro sang Philippine Coast Guard (PCG) nga wala nagapangisda ang Chinese Fishing vessel sang mabungguan ang fishing boat sang 22 ka manugpangisda nga Filipino sa Recto bank sa West Philippine Sea.
Sa interview sang Bombo Radyo kay PCG Commandant Admiral Elson Hermogino, iya ginpahayag nga ang Recto bank ang kilala nga fishing ground apang ginadumilian ang mga dumuluong nga magpangisda bangud sakop ini sang Exclusive Economic Zone sang Pilipinas.
Sa pihak sini, gin-athag ni Hermogino nga ang Recto bank ang passive area sang international shipping gani indi mahimo nga kwestyunon ang presensya sang mga foreign vessel.
Bangud wala man sang ikasarang ang Pilipinas nga bantayan ang Recto bank sa sulod sang 24 oras, ginpahayag ni Hermogino nga indi madula sa paminsaron sang mga Filipino nga nagapangisda ang Chinese fishing vessel sa area.
Ginpahayag sang PCG Commandant nga wala nagapangisda ang mga Chinese kag posible nga naglabay lang sila sa Recto bank sang adlaw nga nabungguan ang fishing boat sang mga Filipino nga manugpangisda.
