Emosyonal samtang nagahatag sang mensahe si Police Regional Office (PRO) 6 Director Police Brigadier General John Bulalacao kadungan sang iya farewell visit sa Iloilo City Police Office (ICPO).
Suno kay Gen. Bulalacao, iya ginpahayag nga nagakadapat nga protektahan sang mga pulis ang ila reputasyon bangud sila ang isa ka imahe sang publiko.
Kinahanglan man nga ipabilin sang otoridad ang disiplina, pagka-passionate kag dedikado sa pagserbisyo sa mga pumuluyo.
Likawan man dugang pa sang natungdan ang mag-absent kag indi gid mag-AWOL.
Nagpanugyan man si PRO-6 Director nga ang pinaka-importante nga himuon sang mga pulis amo ang pagpangamuyo agud nga ubayan ang mga ini sang Ginoo sa ila tagsa ka mga ginahimo.
Kuntento naman si Gen.Bulalacao sa iya nangin serbisyo sa PRO-6 sa diin ma-retire siya nga malipayon.
Samtang tatlo naman ka mga police officials ang posible nga magatal-os sa posisyon ni Gen. Bulalacao.
Ini amo sanday Police Brigadier General Ferdinand Divina, deputy director sang PNP Directorate for Intelligence (DI); Police Brigadier General Rene Pamuspusan, PNP Headquarters Support Service Director sang Camp Crame kag Police Brigadier General Joselito Esquivel Jr., ang Quezon City Police District (QCPD) director.
Sa pihak nga bahin, ginpabugal sang tiayon ni Police Regional Office (PRO) 6 Director Police Brigadier General John Bulalacao ang accomplishment sang iya nga bana.
Ini matapos sa ginpatigayon nga farewell visit sang PRO-6 Director sa Iloilo City Police Office (ICPO).
Sa interview sang Bombo Radyo kay Mrs. Rose Bulalacao, iya ginpahayag nga ‘good health’ lamang ang iya ginapangayo sa Ginoo para kay Gen. Bulalacao.
Suno kay Mrs. Bulalacao, malipayon siya nga makahatag na sang madamo nga oras ang iya nga bana sa ila nga pamilya.
Nahibaluan nga maga-retire na sa iya nga position si Gen. Bulalacao sa maabot nga Hunyo 27.
