ILOILO– Magapatigayon sang scheduled meeting ang Provincial Disaster Risk Reduction and Management Office (PDRRMO) kaupod si Iloilo Governor Arthur Defensor Sr. may kaangtanan sa nagataas nga kaso sang dengue sa probinsyasa Iloilo.
Sa interview sang Bombo Radyo kay Dr. Jerry Bionat, pinuno sang PDRRMO, iya ginpahayag nga sa nasambit nga pagsinapol,magadihon sila sang proposal nga ipaidalom ang probinsya sa state of epidemic ukon outbreak of disease.
Isa sa mga ila ginabasehan suno kay Bionat amo ang datos humalin tuig 2017 tubtob 2019 sa diin makita nga nagtaas ang kaso sang dengue kag mas nagtaas subong nga 2019 ipaanggid sa mga nakaligad nga tinuig.
Suno pa kay Bionat, ang datos humalin Enero tubtob Hunyo subong nga tuig ang makabig nga makaalarma bangud may nagkalamatay kag madamo na ang apektado nga mga pumuluyo.
Ang nasambit nga pagsinapol nga gintalana sa Lunes ang pagatambungan sang Social Welfare and Health, PDRRMO, Agriculture, Philippine National Police (PNP), Philippine Army, Philippine Coast Guard kag iban pa nga katapo sang risk reduction and management office.
