ILOILO CITY – Bawion sang Iloilo City Urban Poor Affairs Office (ICUPAO) ang mga pamalay nga ila ginhatag sa Uswag Subdivision sa San Isidro Jaro Iloilo City sa tion nga mapamatud-an nga wala gina-istaran sang mga relocatee.
Sa interview sang Bombo Radyo kay Atty. Edmundo Buensoceso, Director sang ICUPAO,iya ginpahayag nga sa tion nga matukiban nga wala gina okupar sang relocatee ang gin award nga pamalay sang ICUPAO, padal-an nila ini sang notice.
Sa tion nga makalab-ot sa tatlo tubtub apat ka notice kag indi makasabat ang relocatee, gilayon nga bawion sang ICUPAO ang gin-award nga pamalay kag ihatag sa iban nga mga deserving nga pamilya.
Suno kay Buensoceso, madamo sang mga applicant nga luyag maka angkon sang balay kag ila man ini ginahatagan sang pamalay sa tion nga may matabo nga reversion.
Madamo suno sa natungdan sang mga relocatee nga wala naga istar sa pamalay nga ginhatag sang ICUPAO apang ginpagwa lang nga ila ini gina istaran pinaagi sa pagbutang sang gamit.
Mapilitan suno kay Buensoceso ang mga otoridad nga kakason ang kandado sa isa ka balay sa tion nga indi ini maistaran bangud ang propedad ang ginapanag iyahan sang gobyerno kag indi sang pribado nga tawo.
