Ginplastar ni Mayor Eugene Gallo Reyes sang Buenavista, Guimaras ang iya mga plano kadungan sang iya pormal na nga pagpungko bilang alkalde sang nasambit nga banwa sa iya ikatatlo nga termino.
Sa interview sang Bombo Radyo Iloilo kay Mayor Reyes, iya ginpahayag nga sentrohan niya ang pagdihon sang ordinansa nga magadumili sang pagbaligya sang sigarilyo sa banwa kag ordinansa nga nagahatag sang incentives kag assistance sa mga senior citizens nga nagaedad 90-anyos pasaka.
Suno sa alkalde, iya man tinguhaan nga mapalapad kag mapaayo ang terminal sang pumboats sa Buenavista Wharf para mangin convenient sa mga pasahero nga nagatabok halin sa Guimaras pakadto sa syudad sang Iloilo.
Positibo man ang opisyal nga ma-umpisahan na sa labing madali nga panahon ang pagtukod sang taytay nga magakonekta sang Panay kag Guimaras pakadto sa Negros.
Suno sa natungdan, may patigayunon nga public scoping sa munisipyo sang Buenavista sa palaabuton nga Hulyo 17,2019 nga pagatambungan sang mga stakeholders kag iban nga involved sa nasambit nga proyekto lakip na ang mga tiglawas sang Chinese government nga amo ang magapondo sa proyekto.
Samtang, nagpangayo sang pasaylo si Reyes sa kapaslawan sini nga magtambong sa oath-taking sang bag-o nga set sang elected officials sa probinsya sang Guimaras sang Hunyo 29.
Suno sa alkalde, may conflict sa iya schedule sang amo nga adlaw bangud may gintambungan ini nga kasal.
Apang ginpahayag niya nga naka-oath-taking naman siya sa Malacañang upod sa iban nga nagdalaug nga miembro sang Partido Demokratiko Pilipino–Lakas ng Bayan ( PDP-Laban) sa atubang mismo ni Presidente Rodrigo Duterte sadtong Hunyo 25,2019.
