ILOILO CITY– Gin-isa-isa ni Iloilo Governor Arthur “Toto” Defensor Jr. ang mga plano sini kadungan sang pormal na nga pagpungko subong nga adlaw bilang amay sang Probinsya sang Iloilo.
Ini ang ginpahayag ni Defensor kadungan sang flag ceremony sa Iloilo Provincial Capitol.
Suno kay Governor Defensor kinahanglan nga magbinuligay ang tagsa-tagsa para sa maayo nga serbisyo sa mga pumuluyo.
Ginpakigbahin man sang gobernador ang importansya sang maayo, madasig apang polido nga pagtrabaho.
Nalakip man diri ang sa bahin sang pagpanglimpyo sa diin nangin halimbawa diri ang kinalain sang pagpaninlo sang Iloilo International Airport kag sa iban pa nga mga paluparan sa pungsod.
Indi na suno kay Defensor pag-hulaton pa ang bwas nga adlaw para sa mga bagay nga mahimo man sa gilayun.
Nagapangayo man si Defensor sang bulig sang tagsa ka empleyado sang kapitolyo lakip na ang mga opisyales agud mahatag ang nagakaigo kag maayo nga serbisyo sa mga pumuluyo sang probinsya sang Iloilo.
