Indi pabor ang China nga may yara sang 3rd party investigator sa natabo sa Recto Bank sang Hunyo 9 sa diin nasalakay sang isa ka Chinese fishing vessel ang Pinoy fishing boat nga may sakay nga 22 ka mga manugpangisda.
Suno kay Presidential Spokesman Atty. Salvador Panelo, santu sa pagpahayag ni Ambassador Chito Sta. Romana, mas maayo kun joint investigation lamang sang China kag Pilipinas ang ma-imbestiga sa natabo nga insidente sa West Philippine Sea kag wala na sang 3rd party investigator.
Dugang pa ni Panelo, kun lain-lain ang finadings sang China kag Pilipinas sa insidente sang Hunyo 9, desidido ang gobyerno nga iduso ang pagpahamtang sang 3rd party investigator.
Pabor man si Presidente Rodrigo Duterte sa 3rd party investigator ukon joint investigation man agud nga matapos na ang isyu sa West Philippine Sea.
Pahayag pa ni Panelo, indi man luyag sang gobyerno nga mangayo lang sang pasaylo ang China sa 22 ka mga manugpangisda matapos ginbayaan sila samtang nagalutaw-lutaw sa baybayon sang Recto bank.
Ginbuyagyag man ni Panelo nga wala sang may ginpirmahan nga pormal nga dokumento sanday Duterte kag Chinese President Xi Jinping may kaangtanan sa kasugtanan sang duha ka mga lider sa pagpangisda sa West Philippine Sea.
Una na nga ginpahaya ni Duterte nga may yara sila sang kasugtanan ni Xi nga indi na pagbalabagan sang mga Intsik nga manugpangisda ang mga Pilipino sa Scarborough Shoal kag pahanugutan na nga makasulod sa Recto Bank ang mga Intsik.
