ILOILO CITY – Indi pagpaslawon sang Philippine Dental Dental Health Association ang mga pumuluyo nga magakadto sa Bombo Medico 2019 nga patigayunon sa Hulyo 14 sa Iloilo Scinence and Technology University (ISATU).
Sa interview sang Bombo Radyo kay Dr. Cheryl Mae Silva, Secretary sang Philippine Dental Health Association – Iloilo Chapter, iya ginpahayag nga ang ila grupo ang wala sang punaw nga nagasuporta sa Bombo Medico.
Suno kay Dr. Silva, may yara sang libre nga tooth extraction ukon paggabot sang ngipon.
Bag-o magpagabot sang ngipon, kinahanglan anay nga magpaidalom sa konsultasyon agud nga mahibalu-an kun bala mahimo gabutan sang ngipon ang isa ka tawo.
Nagakinahanglan man nga busog kag may yara sang nagakaigo nga pahuway bag-o ang tooth extraction.
Pagkatapos nga magabutan sang nipon, likawan anay ang paghakwat sang mga mabug-at nga butang.
May panugyan man ang natungdan sa mga may yara sang HIV/AIDS ukon makalalaton nga balati-an nga mas makapaayo nga magpakonsulta ukon magpagabot sang ngipon sa pribado nga doktor agud nga malikawan ang paglapta sang balati-an.
Yari ang pahayag sang commitment sang Philippine Dental Health Association-Iloilo Chapter nga magpakigbahin sa Bombo Medico 2019.
