ILOILO CITY- Nagakahangawa sa iya kabuhi ang isa ka lider sang cause oriented group matapos ginapahayag may nagtuyo nga mag-istorya sa iya nga duha ka mga kalalakihan sa Brgy. Bitoon Jaro Iloilo City.
Sa interview sang Bombo Radyo kay Punong Barangay Jonalyn Provido, iya ginpahayag nga nagakahangawa si Mr. Wilfredo Panuela sa iya kabuhi bangud sa pagpakig istorya sang duha ka lalaki nga nagpakilala nga mga myembro sang National Bureau of Investigation (NBI) kag Philippine Army.
Ang nagpakilala nga katapo sang NBI amo si Art Diaz samtang ang katapo naman sang Philippine Army ang ginkilala nga si Rey Gomez.
Sang ginkapkapan sang isa ka kagawad ang duha ka lalaki, natukiban nga may yara sang armas kag kumpleto man sa dokumento apang sa bahin naman ni Punong Barangay Provido, wala siya sang may nakita nga armas sa duha.
Nahibaluan nga nakasakay sa motorsiklo ang duha, naka-short kag naka kalo.
Nagpabalhag naman sa Jaro Police Station ang lider sang cause oriented group matapos ang natabo nga insidente.
