NEGROS OCCIDENTAL– Ginkakibot sang kadam-an ang nagluntad gulpyada nga pagkambyo sang liderato sang Vallacar Transit Inc. (VTI) Ang kilala kag pinakadako nga bus transport company sa pungsod.
Ini matapos gin-ilisan si Leo Rey Yanson sang iya magulang nga si Roy Yanson bilang Presidente sang VTI pinaagi sa isa ka special board meeting.
Ini ang gintambungan sang bag-o nga Presidente kag mga utod sini nga sanday Lourdes Celina Yanson-Lopez, Emily Yanson, Ricardo Yanson Jr.
Samtang wala naman nakatambong sanday si Leo Rey Yanson bangud sa man sa iya scheduled appointment, utod nga si Janet Yanson kag iloy nga si Olivia Villaflores Yanson.
Isa sa mga ginatudlo nga rason kun ngaa gin-islan si Leo Rey bilang Presidente bangud ginapahayag halos isa na ini katuig nga wala nakareport sa iya opisina bangud nangin masako ini sa Ceres Negros Football Club nga sa subong nagahimo na sang pangalan sa mga football competition sa SouthEast Asia.
Gin-akusaran man si Leo Rey nga ang ginasweldo niya sa mga football players ang ginakuha mismo sa kita sang ila kumpanya.
Samtang, magapadayun ang normal nga operasyon sang Vallacar Transit apisar sang pag-ilis sang kompaniya sang Presidente.
Sa interview sang Bombo Radyo kay Atty. Shiela Sison Vice President for legal sang Vallacar Transit Inc.iya ginpahayag nga wala sang paga-untaton nga serbisyo sang kumpaniya apisar sang pagbag-o sang pamunuan.
Ginpasiguro man ni Sison ang security of tenure sang tagsa ka empleyado nga nagatrabaho sa nasambit nga kompaniya.
Ang pag-ilis sang pamunuan suno kay Sison ang isa sa pamaagi agud mas mapamaayo pa ang serbisyo sang Vallacar Transit.
Wala man sang kun sin-o suno kay Sison sa gwa sang kompaniya ukon sang board nga nag-impluwensya sa pagpatigayun sang special board meeting.
Ginpanginwala man niya nga may yara sang presensya sang armed men sa ginpatigayun nga special board meeting.
Nahibaluan nga ang mga ceres bus nga nagabyahe sa Iloilo kag sa bug-os nga Panay lakip na sa Negros ang yara sa idalom sang Vallacar Transit sa diin may kabug-usan ini nga 8,400 units kag halos 16,000 ka mga empleyado.
Magluwas sa Vallacar, ang pamilya Yanson man ang nagapanag-iya sang Rural Transit of Mindanao, Ceres transport Inc.,Southern Star Bus Transit ,Gold Star Bus Transit kag Mindanao Star Bus Transport Inc.
Gintukod naman ni Ricardo B. Yanson nga nagtaliwan sadtong October 25,2015 kag ni Olivia Villaflores Yanson. Nangin una man nila nga branding ang Ceres liner.
