ILOILO CITY – Padayon ang kampanya sang pamunu-an sang Iloilo Central Elementary School agud nga matapna ang pagdamo sang lamok nga nagadala sang Dengue Hemorrhagic Fever.
Ini ang kasunod sang kamatayon sang Grade 2 pupil bangud sa nasambit nga balati-an.
Sa interview sang Bombo Radyo kay Dymphna Leizel Jocson, Principal IV sang nasambit nga buluthu-an, iya ginpahayag nga humalin sang bulan sang Hunyo, nag-umpisa na sila sang ila kampanya kontra Dengue kasubong na lang sang pagpaninlo, pagpasuksuk sa mga estudyante sang knee-socks, long sleves ukon pantalon agud nga indi makagat sang lamok.
Magluwas diri, ang mga manunudlo kag ginikanan ang nagabuligay sa pagdala snag oregano kag tanglad agud nga ibutang sa palibot sang classroom ukon sa palibot sang school campus agud nga makatapna sa pagduging sang lamok.
Samtang, nagahingyo naman sang bulig gikan sa mga estudyante, ginikanan kag media si Jocson agud nga matapna ang Dengue Hemorrhagic Fever.
Suno kay Jocson, nagakinahanglan nga sundon sang mga estudyante ang mga ginapanugyan sa ila nga magsuksuk sang knee-socks, pantalon kag long sleeves agud nga indi makagamt sang lamok.
Mas makapaayo man suno kay Jocson nga baklan sang mga ginikanan ang ila mga kabataan sang mosquito repellents agud nga makalikaw sa kagat sang lamok.
Magluwas diri, nagahingyo man si Jocson sang bulig sang media sa pagpangahop sa publiko kun paano matapna ang Dengue Hemorrhagic Fever.
