ILOILO CITY – Nagsaka na sa pito ang kaso sang Dengue Hemorrhagic Fever sa Brgy. Tacas, Jaro, Iloilo City.
Ini ang kasunod sang kamatayon sang Grade 1 Pupil bangud sa nasambit nga balati-an.
Sa interview sang Bombo Radyo kay Punong Barangay Joseph Poral sang nasambit nga lugar, iya ginpahayag nga ang kamatayon sang anak sang mag-asawa nga Hortillo ang labing una nga casualty sa ila lugar.
Suno kay Poral, tuman ka lapad ang Barangay Tacas rason nga indi man mahibalu-an kun sa diin nakuha sang biktima ang Dengue.
Sa pagkamatuod suno kay Poral, may yara na sang bulong nga ginhatag ang City Health Office agud nga gamiton sa pagpatigayon sang spraying sa palibot para mapatay ang Dengue Carrying Mosquitoes.
Sa subong suno sa Punong Barangay, padayon ang ila pagpatigayon sang spraying sa ila barangay agud nga matapna ang pagduging sang Dengue.
Nahibalu-an nga ang kamatayon sang anum ka tuig nga bata ang ika-pito na nga casualty sang Dengue sa syudad sang Iloilo.
