ILOILO CITY– Positibo ang panan-awan sang pinuno sang asosasyon sang mga transport operators sa pagpahamtang sang Point to Point (P2P) buses sa Iloilo Business Park sa Mandurriao, Iloilo City.
Sa interview sang Bombo Radyo Iloilo kay Mr Perfecto Yap, presidente sang Association of Taxi Operators of Panay kag presidente man sang new Iloilo Airport Transport Association, iya ginpahayag nga makabig nga ka-kompetensiya sang ila asosasyon ang mga P2P buses.
Suno kay Yap, kun may yara sang kompetisyon, mapilitan ang mga ini nga paayuhon pa gid ang ila serbisyo.
Nagalaum naman si Yap nga tumanon sang P2P buses ang nasaad sa ila prangkisa sa diin indi mahimo nga makakuha kag makapapanaog sang mga pasahero samtang nagapadulong sa tagsa ka ruta ang mga P2P buses.
Apang nabalaka naman ang natungdan pananglitan nga indi pagtumanon sang P2P buses ang nasaad sa prangkisa kag magapangpick-up sang mga pasahero bangud pat-ud nga maapektuhan sang dako ang ila asosasyon.
Nahibaluan nga ang mga P2P buses ang may ruta nga Iloilo Business Park padulong sa Iloilo Airport vice versa; Iloilo Business Park padulong sa Roxas Airport vice versa; Iloilo Business Park padulong sa Kalibo Airport vice versa; kag Iloilo Business Park padulong sa Caticlan Airport vice versa.
