ILOILO CITY – Magabakal sang mga sprayer, fogging machine kag chemicals ang Iloilo City Government agud nga matapna ang pagduging sang Dengue Hemorrhagic Fever.
Ini ang ginkasugtan sa ginpatigayon nga pagsinapol nanday Iloilo City Mayor Jerry Treñas kag sang City Disaster Risk Reduction and Management Council.
Sa interview sang Bombo Radyo kay Mayor Treñas, iya ginpahayag nga ginkasugtan sa pagsinapol nga ang iban sa disaster funds ang igabakal sang sprayer, fogging machine kag chemicals agud nga matapna ang Dengue.
Suno kay Treñas, padayon pa ang pag-validate sang City Health Office agud nga mahibalu-an kun pila gid ang kabug-usan nga Dengue cases sa syudad sang Iloilo kag nakadepende diri kun bala nagakadapat nga ideklarar ang Dengue outbreak.
May kaangtanan diri, ginpahayag sang alkalde nga sa maabot nga Hulyo 20, Sabado, igalunsyar ang ‘Ugsaran tinlu-an para balati-an malikawan’.
Ginapahayag sang alkalde nga ang dululungan nga pagpaninlo sa palibot ang igalunsyar sa Brgy. Calumpang, Molo kag maga-umpisa 6:00 sa aga.
Nagpahayag man si Mayor Treñas sang pagsuporta sa kampanya sang Bombo Radyo Philippines nga ‘Bombo Oplan Kontra Dengue’.
Suno kay Mayor Treñas, kinahanglan nga magbuligay ang tanan sa pagpaninlo sang ugsaran agud nga wala sang pugaran ang lamok nga nagadala sang nasambit nga balati-an.
