CABATUAN, ILOILO – Problema sang tagdumalahan sang Ramon Tabiana Memorial District Hospital sa Cabatuan, Iloilo ang kagutok kag ang kagin-ot sa nasambit nga hospital bangud sa pagdamu sang pasyente nga may yara sang Dengue Hemorrhagic Fever.
Sa interview sang Bombo Radyo kay Dr. Francisco Ronnel Quiñon, Chief of Hospital II sang nasambit nga district hospital, iya ginpahayag nga naglab-ot na sa 206 ang kabug-usan nga pasyente nga na-admit sa diin nagalab-ot sa 125 ang may yara sang Dengue.
Suno kay Quiñon, kalabanan sa mga pasyente nga may Dengue amo ang mga kabataan.
Ginpahayag ni Quiñon nga magluwas sa kulang nga hospital staff, isa man sa problema amo ang tuman ka damu nga pasyente.
May mga naghatag na sang mosquito nets kag folding beds suno kay Quiñon apang ang ginaproblemahan naman subong amo ang kakulang sang electric fans.
Nagpromisa naman suno sa natungdan ang Iloilo Provincial Government nga gastuhan ang pagpabutang sang screen sa mga bintana sang hospital agud nga indi makasulod ang lamok.
