ILOILO – Ipatuman gid sang Police Regional Office 6 sa pagpamuno ni Police Brigadier Gen. Rene Pamuspusan ang squad system ilabi na sa pagsilot sa mga pulis nga may yara sang kapaltahan.
Ini ang kasunod sang pagpahubog nanday Patrolman Joerick Ace Ilisan kag Corporal Esil Peñarubia sa sulod sang Pototan Municipal Police Station kag ang pagpahog nga patyon ang hepe nga si Police Major Ronnie Brillo.
Sa interview sang Bombo Radyo kay Pamuspusan, iya ginpahayag nga epektibo ang pagpatigayon sang Squad System agud nga magtarong ang mga pulis.
Sa squad system suno kay Pamuspusan, ang sala sang isa ka pulis ang sala man sang bug-os nga unit kun sa diin na-assign ang nasambit nga pulis.
Ginpaanggid man ni Pamuspusan sa isa ka pamilya ang ginatawag nga squad system sa diin ang sala sang isa ang may yara sang domino effect.
Nauna na nga ginpahayag ni Iloilo Police Provincial Office Director Police Col. Marlon Tayaba nga mahimo nga maulamid man sa kaso ang squadmates ukon mga kaupod nanday Ilisan kag Peñarubia bangud sa pagpahanugot sa duha ka pulis nga magpahubog sa sulod sang police station.
