ILOILO CITY – Nagpositibo sa ginpatigayon nga cross matching ang hubog nga pulis nga nagpalupok kag nagpaandam nga patyon ang ila hepe sa Pototan Municipal Police Station sa banwa sang Pototan, Iloilo.
Ini amo si Patrolman Joerick Ace Ilisan, assign sa Pototan PNP.Sa interview sang Bombo Radyo kay Police Col. Enrique Ancheta, pinuno sang Regional Crime Laboratory Examination Office sa Police Regional Office 6, iya ginpahayag nga nagsanto ang armas sa bala nga narekober sa ginluntaran sang insidente.
Apang nag negatibo man si Ilisan sa drug test.
Matandaan nga si Ilisan ang nangin kontrobersyal matapos madakpan sang inspection team sang Police Regional Office 6 nga nagapahubog kag wala nagasuksok sang uniform kaupod si Police Corporal Esil Peñarubia.
Sang gin-akigan ang mga ini sang ila hepe nga si Major Ronnie Brillo, naakig pa si Ilisan, nagpalupok sang pusil kag nagpaandam nga nga patyon ang ila hepe.
Nahibaluan nga nakapyansa naman si Ilisan matapos ginpreso.
Sa subong, nagapabilin sanday Ilisan kag Peñarubia sa Regional Personnel Holding and Accounting Unit.
