Limitahan sang Department of Education ang aktibidad sang mga kabataan sa eskwelahan bilang kabahin sang kampanya agud matapna ang pagduging sang dengue hemorrhagic fever.
Ini matapos nga ginpaidalom sa dengue outbreak ang bilog nga Western Visayasv sa diin kapin 19,000 na ang numero sang mga biktima sang dengue kag kapin 100 na ang patay.
Sa interview sang Bombo Radyo kay Department of Education Region 6 Assistant Regional Director Victor Degracia, iya ginpahayag nga naabisuhan na ang tanan nga buluthuan nga indi pagpahanugutan nga maghampang ang mga kabataan paglampas sang alas-3 sa hapon pasaka agud indi ang mga ini ma- expose sa lamok.
Suno kay Degracia, dapat sundon man sang mga eskwelahan ang panugyan sang Department of Health para maproteksyunan ang mga kabataan gikan sa kagat sang lamok kaangay sang pagsuksok sang malaba nga medyas.
Ginpahayag sang natungdan nga padayon man ang pagbutang sa mga treated nets ukon screen sa mga classrooms agud indi makasulod ang mga lamok.
Importante man suno kay Degracia nga mapabilin nga matinlo ang palibot sang ekswelahan agud wala sang pamugaran ang lamok nga nagadala sang dengue.
Samtang, ginpahayag naman ni Degracia, nga magapadayon ang regular nga pagpatigayon sang Brigada Kontra Dengue sa tanan nga mga buluthuan sa rehiyon.
