ILOILO CITY– Nagpasalig ang Philippine Charity Sweepstakes Office nga magapadayon ang ila paghatag sang bulig-pinansyal sa mga pigado nga may yara sang problema sa ikaayong lawas.
Ini sa pihak sang pagpauntat ni Presidente Rodrigo Duterte sa tanan nga gaming activities sa idalom sang Philippine Charity Sweepstakes Office kaangay sang Lotto kag Keno sa diin ginakuha sang ahensya ang kwarta nga ginapain para sa paghatag sang bulig-pinansyal sa mga pigado.
Sa interview sang Bombo Radyo kay Jeanette Lloyd, Branch Manager sang Philippine Charity Sweepstakes Office-Iloilo, iya ginpahayag nga may yara sang savings ang Philippine Charity Sweepstakes Office nga sarang mag-augment agud mahatagan sang bulig -pinansyal ang mga pigado nga may balayran sa ospital ukon may kondisyon nga medikal nga nagadangop sa ila opisina.
Suno kay Lloyd, may yara sang daily budget ang Philippine Charity Sweepstakes Office nga 400,000 apang mas manubo ini sa 800,000 nga daily budget sadto bangud nagnubo man ang income sang ahensya.
Ginpahayag man sang natungdan nga sa isa ka adlaw, may yara sang kapin 100 nga nagapangayo sang pinansiyal nga bulig sa Philippine Charity Sweepstakes Office-Iloilo.
