ILOILO CITY – Maga-umpisa na subong nga adlaw ang Oplan Hawan sang Public Safety and Transportation Management Office sa mga major roads sa syudad sang Iloilo.
Ini ang kasunod sang pag-umpisa na sang 60-day implementation period nga ginhatag sang Department of Interior and Local Governemnt sa tagsa ka local chief executive nga ipatuman ang clearing operations.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga unahon nila sa paghawan amo ang mga dalan sa Brgy. Alalasan kag Brgy. Jalandoni Estate sa Lapuz kag ang Brgy. Aguinaldo kag McArthur sa La Paz.
Suno kay Conlu, kun matapos na ang clearing operations sa mga nasambit nga lugar, igasunod sang Public Safety and Transportation Management Office amo ang City Proper area.
Ginpahayag ni Conlu nga kuhaon gid ang tanan nga obstruction sa dalan lakip sa sa sidewalk.
Tun-an man nila suno sa natungdan kun bala sakop man sa clearing operation ang mga nagabaligya sa higad sang dalan sa tion sang gab-i.
Sa subong suno kay Conlu, may yara na sang gintukod nga committee ang Public Safety and Transportation Management Office agud nga magtuon sa nasambit nga tuyo.
Kampante si Conlu nga masarangan sang Public Safety and Transportation Management Office nga mapatuman ang clearing operation sa bug-os nga syudad sang Iloilo sa sulod sang 60-day implementation period.
