ILOILO CITY – Nagdugang sa listahan sang mga casualty sang Dengue Hemorrhagic Fever sa syudad sang Iloilo ang grade 7 pupil sa Brgy. Sto. Niño Norte, Arevalo, Iloilo City.
Sa interview sang Bombo Radyo kay Ramelyn Generale, iloy sang grade 7 pupil, iya ginpahayag nga sang nagligad nga Hulyo 22, Lunes, nag-umpisa nga makabatyag sang hilanat ang iya anak kag gilayon niya nga ginpakunsulta sa health center.
Natukiban suno kay Generale nga nagpositibo sa Dengue ang iya anak nga nagabatyag na sang pagpin-ot sang pagginhawa kag pagmala sang tutunlan.
Bangud sini, ginpa-admit niya sa Western Visayas Medical Center ang iya anak apang sa pag-abot nila sa hospital, ginhambalan lang sila sang isa doktor nga babayi nga mahimo nga indi na lang pag i-admit ang pasyente agud nga indi na magdugang sa kagutok sa hospital.
Ginpahayag ni Generale nga iya man nga nahangpan ang mabudlay nga kahimtangan sang mga pasyente sa hospital bangud nga madamu ang naadmit bangud sa Dengue outbreak.
Sa pihak sini, ginpahayag sang natungdan nga nadayon ang pag-admit sang iya anak sa hospital apang ginahatagan lang sang paracetamol kag bulong para sa sakit sang tiyan ang iya anak.
Sang Hulyo 28, Dominggo, sang hapon, ginpahayag ni Generale nga ginbawi-an sang kabuhi ang iya anak.
Ginkwestyon man ni Generale kun nga-a, sang Hulyo 25, Huwebes, ginpanugyan na sang doktor nga i-discharge na lang sa hospital ang bata bangud nga santo sa findings, indi man Dengue ang balati-an sang pasyente.
Ginpanindugan sang iloy nga nagpositibo sa Dengue ang iya anak santo sa test result gikan sa health center kag sa mga sintomas nga ginabatyag sang pasyente.
Bangud sini, nagsaka na sa 10 ng patay bngud sa Dengue sa syudad sang Iloilo.
