DPWH REGION 6– Nagpasalig ang Department of Public Works and Highways- Region 6 nga ila buligan ang mga Local Government Units sa paghawan sang mga dalanon gikan sa road obstructions kasunod man sang mando ni Presidente Rodrigo Duterte.
Sa interview sang Bombo Radyo kay Amy Tantiado, Officer In Charge/ Public Information Officer sang Department of Public Works and Highways- Region 6, iya ginpahayag nga apisar nga national roads ang sakop sang ila jurisdiction kag indi ang mga local roads, apang handa sila nga maghatag assistance sa mga Local Government Units.
Suno kay Tantiado, kinahanglan lang nga magpadala sang request ang Local Government Unit sa ila talatapan ukon sa regional director.
Nagakadapat man nga ibutang sa request kun ano nga sahi sang assistance ang kinahanglan sang isa ka Local Government Unit.
Sa subong suno sa natungdan, ang Iloilo City Government pa lang ang nakapangayo sang bulig sa Department of Public Works and Highways pinaagi sa counterpart sang ahensya nga Iloilo City District Engineering Office sa diin nakapatigayon na sang clearing operation subong nga adlaw ang syudad.
Wala man sang iban pa nga Local Government Unit ang nakapasa sang request sa Department of Public Works and Highways Region 6 para mangayo sang bulig para sa clearing operations sa mga road obstructions.
