ILOILO CITY – Gamay ang numero sang mga salakyan nga ginguyod kadungan sang Oplan Hawan sa distrito sang La Paz kag Lapuz sa syudad sang Iloilo.
Sa interview sang Bombo Radyo kay Jose Romeo ‘Jojo’ Jamerlan, deputy chief for operations sang Land Transportation Office 6, iya ginpahayag nga katungdanan sang ahensya amo nga magbulig sa Public Safety and Transportation Management Office kag sa Taskforce Anti-Squatting and Illegal Structures Unit sa pagpatigayon sang clearing operations.
Suno kay kay Jamerlan, assistance mode ang katungdanan sang Land Transportation Office sa ginapatigayon nga Oplan Hawan.
Ginpahayag ni Jamerlan nga ang nasambit nga lihok ang kabahin man sang road safety advocacy sang ahensya.
Suportado sang Regional Highway Patrol Unit ang ginapatigayon nga Oplan Hawan.
Sa interview sang Bombo Radyo kay Corporal Bryan Estandian sang Regional Highway Patrol Unit, iya ginpahayag nga maga-upod sila sa 60-day implementation period.
Suno kay Estandian, kaupod sang Land Transportation Office, sila sa Regional Highway Patrol Unit ang nagahatag sang notice sa mga driver nga naga-illegal park sang ila salakyan.
Ginpahayag ni Estandian nga kun madala man lang sa istorya kag pagsaway, indi na kinahanglan pa nga hatagan sang notice ang traffic violators.
Samtang, kalabanan sa mga ginpangsaway sa ginpatigayon nga Oplan Hawan sa Brgy. Alalasan, Lapuz, Iloilo City amo ang mga trisikad kag tricycle driver.
May mga trisikad kag tricycle driver nga nagbalalik sa pagparking sa higad sang dalan pila ka oras matapos ang ginpatigayon nga clearing operations sa lugar.
Magluwas diri, may pila naman ka ambulant vendor nga nagabaligya sa higad sang sidewalk.
May yara man sang pila ka mga salakyan nga nakaparking sa sidewalk kag nagalapaw sa gutter sang dalan ang royda.
