GUIMARAS – Magabakal sang dugang nga larvicide, bulong, equipment, mosquito nets kag Dengue Rapid Kits ang Local Government Unit sang probinsya sang Guimaras.
Ini ang kasunod sang deklarasyon ni Gov. Samuel Gumarin nga ipaidalom sa state of calamity ang probinsya sang Guimaras bangud sa Dengue outbreak.
Sa interview sang Bombo Radyo kay Gumarin, iya ginpahayag nga ang 5% nga Local Disaster Risk Reduction Management Quick Response Fund ang mahimo na nga magamit agud nga ibakal sang bulong kag mga equipment agud nga matapna ang pagduging sang Dengue Hemorrhagic Fever.
Suno kay Gumarin, ang mga bulong kag medical kits nga pagabaklon sang Local Government Unit ang igapanghatag sa mga hospital kag rural health unit sa Guimaras.
Magluwas diri, maga-hire man sang dugang nga doktor kag medical pratitioners ang Local Government Unit agud nga matatapan ang tanan nga pasyente nga naadmit sa mga hospital.
Humalin sang Enero 1 tubtub Hulyo 20, 2019, naglab-ot na sa 893 ang Dengue case sa Guimaras sa diin tatlo na ang patay.
