Naghingyo ang presidente sang Yanson Group of Bus Companies nga tag-iya sang Vallacar Transit nga indi anay pagdayunon sang mga empleyado ang plano nga pagpatigayon sang transport strike.
Ini ang may kaangtanan sa ginapangayo nga benepisyo sang mga empleyado nga tubtub subong wala sa gihapon mahatag.
Dugang pa ang nagataas nga tensyon sa tunga sang mag-ululutod nga Yanson kun sa diin nagalibog ang ulo sang mga empleyado kun sin-o ang kilalahon nga presidente.
Sa exclusive interview sang Bombo Radyo kay Roy Yanson, bag-o nga presidente sang Yanson Group of Bus Companies, iya ginpahayag nga indi niya masabat kag mahatagan sang solusyon sa subong ang mga ginapangayo sang mga empleyado bangud ang nagligad nga management ang nagakadapat magsabat sini.
Suno kay Yanson, nagapangayo siya sang pag-intindi sa mga empleyado kag kun mahimo nga hulaton kag hatagan sya sang gamay nga tinion agud mahatagan nya sang kaathagan ang nasambit nga problema.
