ILOILO CITY PROPER– Nagsabtanay ang Punong barangay sang Brgy. Inday kag Brgy. San Felix, Iloilo City may kaangtanan sa pagpanghawan sang mga dalanon nga sakop sang ila barangay.
a interview sang Bombo Radyo Iloilo kay Punong Barangay Diday Navarro sang Brgy. San Felix, iya ginpahayag nga wala na sang problema ang iya barangay bangud nahatagan na niya sang abiso ang mga residente kag nag amat-amat na sila nga nagpanghawan bag-o pa man mag- abot ang mga katapo sang Oplan Hawan.
Suno kay Punong Barangay Navarro, ang may madamo nga problema kag dapat hawanan amo ang kaiping lang nila nga barangay nga Brgy. Inday.
Dugang pa sang natungdan, naulamid lang ang ila nga barangay sa problema sang pihak nga barangay kun sa diin iya ginpahayag nga madamu nga istruktura ang nagabalabag sa mga dalanon sa Brgy. Inday.
Nagsabat naman si Punong Barangay Rod Sarmiento sang Brgy. Inday sa diin suno sa iya, indi na problema ni Navarro ang problema sang iya lugar.
Dugang pa niya, kun tani problema lang sang iya nga barangay ang gina atipan ni Navarro.
Samtang, naga-alburuto naman ang mga residente sang Brgy. Inday bangud ginareklamo nila ang tyangge ni Punong Barangay Navarro nga yara sa higad sang dalan apang wala ini nadala sa pagpanghawan.
Suno kay Punong barangay Navarro, nagatapik lang ang iya tyangge sa iya balay kag wala ini nagalapaw sa dalan.
Dugang niya, ang mga naga balabag lang sa dalan ang nagakadapat nga kakason kag wala diri nadala ang iya nga tyangge.
