ILOILO CITY – Katungdanan sang Panay Electric Company nga kuhaon ang tanan nga mga poste sang kuryente nga makabig obstruction sa dalan sa syudad sang Iloilo.
Sa interview sang Bombo Radyo kay Engr. Rodney Gustilo, pinuno sang Iloilo City District Engineer’s Office sang Department of Public Works and Highways, iya ginpahayag nga ginkasugtan na sadto sang Panay Electric Company kag sang Iloilo City Government nga pangkuhaon ang mga poste nga nagasablag sa mga dalan bangud man sa road widening project.
Suno kay Engr. Gustilo, indi lang niya madumduman ang petsa sang pagsinapol apang naka-umpisa na suno sa iya ang pagpanghalin sang mga poste.
Sa pagkamatuod suno kay Engr. Gustilo, ang tanan nga poste sang kuryente sa Brgy. Hibao-an Sur, Mandurriao ang napanghalin na sa higad sang dalan.
May kaangtanan naman sa mga nabilin nga poste sang kuryente nga nagasablag sa dalan, ginpahayag sang natungdan nga katungdanan na ini sang nasambit nga electric company.
