ILOILO – Madugay na nga ginapatuman ang tagsa ka mga programa sang Department of Labor and Employment.
Ini ang nangin pahayag sang Kilusang Mayo Uno may kaangtanan sa pag-veto ni Presidente Rodrigo Duterte sang security of tenure bill.
Sa interview sang Bombo Radyo kay Mr. Charlie Ponclara, tagpamaba sang nasambit nga grupo, iya ginpahayag nga ang ginhimo sang Presidente ang nagapakita sang pagtalikod niya sa mga mamumugon sa pungsod.
Madugay na suno kay Ponclara ginapatuman sang Department of Labor and Employment kag sang Public Employment Service Office ang mga programa nga may tinutuyo nga magbulig sa mga mamumugon.
Ang nagakatabo subong suno kay Ponclara ang nagapakita sa gihapon sang presensya sang kontraktwalisasyon sa diin wala sa gihapon nahatagan sang solusyon ang problema sa wala nagataas nga sweldo, madamo sa gihapon ang wala sang may masudlan nga trabaho kag kun may yara man sang mga bag-o nga graduates, indi sa gilayun maregular sa ila tagsa ka trabaho.
Pahayag ni Ponclara, kun tani manindugan ang Department of Labor and Employment nga maregular ang mga empleyado sa tagsa nila nga trabaho agud mahatagan na sang solusyon ang madugay na nga problema sang mga mamumugon sa rehiyon.
