ILOILO CITY– Ginrelieve na ang matag-as nga opisyal sang Philippine Coastguard Iloilo kag Maritime Industry Authority Region 6 nga involved sa natabo nga pagkulob sang tatlo ka mga pumpboats sa Iloilo Strait nga ginkamatay sang 31 ka mga biktima.
Kalakip sa ginpahalin sa pwesto amo si Lt. Commander Perlita Cinco, Station Commander ng Philippine Coastguard- Iloilo.
Sa interview sang Bombo Radyo Iloilo kay Department of Transportation Secretary Arthur Tugade, iya ginpahayag nga kabahin ini sang standard protocol samtang ginapatigayon ang imbestigasyon sa ginaalegar pagpabaya sang duha ka mga ahensya rason nga natabo ang trahedya.
Suno kay Tugade, ila ginapadalman subong ang ginsunod nga proseso kag ginbasehan sang Philippine Coastguard Iloilo kag Maritime Industry Authority sa pagpahanugot sa mga sakayan nga makabyahe sa tion nga malain ang tiempo.
Ginpahayag ni Tugade nga usisaon man kun ginsunod sang nasambit nga mga ahensya ang protocol sa pagpatigayon sang rescue operation ilabi na sa paggamit sang pasilidad kag equipment sa operasyon .
Ginpasiguro naman sang tiglikom nga padayon ang ila pag-improve sa Philippine Coastguard paagi sa paglab-ot sa target nga 30,000 ka mga miembro kag pagdugang sang moderno nga mga equipment kag kagamitan nga ila magamit sa tion sang emerhensiya.
