ILOILO CITY-Ginpasiguro sang Overseas Workers Welfare Administration Region 6 ang pagbulig sa mga Overseas Filipino Workers nga nalakip sa mga napatay kag subong man mga survivors sa Iloilo Strait tragedy.
Sa interview sang Bombo Radyo Iloilo kay Mr. Jack Arroyo, Overseas Workers Welfare Administration Region 6 case welfare officer, iya ginpahayag nga sa walo ka mga Overseas Filipino Workers nga sakay sang nagkulob nga MB Jenny Vince, tatlo gid ang napatay samtang lima naman ang survivors.
Ang mga napatay amo sanday Jackelyn Alferez sang Malabon; Andrew Valenzuela sang Bataan; kag Eden Perales sang Palawan.
Ang mga survivors naman amo sanday Mark Subaldo sang Tacurong,Sultan Kudarat; Catherine Santillan sang Batangas; Antonet Toledo sang Cebu; Normie Cognoson sang South Cotabato; kag Jenette Montemayor sang Pampanga nga ginabulong pa sa ospital sa Syudad sang Iloilo.
Suno kay Arroyo, sila ang nag-asikaso sa pag-transport sang bangkay sang tatlo ka mga biktima pauli sa ila tagsa ka mga lugar.
Samtang sa bahin naman sang mga survivors, magadepende naman ang ihatag nga bulig sa luyag pangayuon sang nasambit nga Overseas Filipino Workers nga nagatrabaho bilang manunudlo sa United Arab Emirates.
Nahibaluan nga nagbakasyon lamang sa Pilipinas ang nasambit nga mga Overseas Filipino Workers.
