ILOILO – Nakahanda ang Office of the Civil Defense nga magbulig sa pagpalab-ot sang relief goods sa mga apektado nga pumuluyo sa isla Gigantes, Carles, Iloilo.
Ini ang kasunod sang deklarasyon nga ipaidalom sa state of calamity ang nasambit nga banwa bangud sa gutom tuga sang malain nga tiyempo.
Sa interview sang Bombo Radyo kay Office of the Civil Defense 6 Regional Director Roberto Nuñez, iya ginpahayag nga bangud nga kanselado sa gihapon ang biyahe sang mga pumpboat, indi makatabok sa mainland ang mga pumuluyo sang isla Gigantes agud nga makabakal sang pagkaon kag iban pa nila nga kinahanglanon.
Suno kay Nuñez, may yara na sang relief goods nga wala pa na-deliver sa mga pumuluyo sa nasmabit nga isla rason nga luyag sang Office of the Civil Defense nga magbulig agud nga matigayon ang delivery.
Magluwas diri, magapakig-angot man ang iya talatapan suno kay Nuñez sa iban pa nga ahensya sang gobyerno agud nga mahatagan sang bulig ang mga pumuluyo.
May yara man sang igahatag nga bulig ang Office of the Civil Defense para sa mga apektado sang kalamidad.
May kaangtanan diri, nauna na nga ginpahayag ni Carles, Iloilo Mayor Siegfredo Betita nga buwas nga adlaw, tinguhaan sang Local Government Unit nga ipanghatag ang relief goods sa mga pumuluyo sang isla.
