ILOILO,CITY– Nakadeploy na ang bug-os nga pwersa sang kapulisan nga magabantay sa seguridad sang mga bisita kag tumalambong sa hiwaton nga 1st ASEAN Bamboo Congress subong nga adlaw sa Iloilo Convention Center.
Sa interview sang Bombo Radyo kay Police Col. Martin Defensor Jr., director sang Iloilo City Police Office iya ginpahayag nga 79 ka mga personnel ang ila nga gindeploy lakip man ang 15 ka mga close-in body guards sang mga VIP’s nga bisita kag may yara man sang 175 ka mga augmentation nga magabulig sa pag mentenar sang katawhay sa nasambit nga event.
Magabulig man ang Bureau of Fire Protection, Philippine Coastguard, City Risk Reduction Management office kag Iloilo City Emergency Response.
Ang labing una nga ASEAN Bamboo Congress ang apat ka adlaw nga event kun sa diin istoryahan ang importansya sang Bamboo ukon kawayan sa bilog nga ASEAN region.
Ang nasambit nga event ang tambungan man sang mga researchers, quality makers kag nagkalain-lain nga mga organisasyon halin sa iban nga pungsod.
Dugang pa ni Defensor, mataas ang iya kumpyensa nga mangin matawhay ang hiwaton nga event bangud man eksperyensyado na sa pag-dumala sang mga kaangay nga aktibadad ang mga kapulisan.
