ILOILO – Ginpasalig ni Police Regional Office 6 Director Police Brigadier General Rene Pamuspusan nga mangin maayo nga director sang Iloilo Police Provincial Office si Pol. Col. Roland Vilela.
Ini ang may kaangtanan sa ginkaulamiran sadto ni Vilela nga kaso bangud sa ginapahayag paghimulos sa isa ka menor de edad nga commercial sex worker kag sex scandal.
Sa interview sang Bombo Radyo kay Pamuspusan, iya ginpahayag nga ginbasura ang kaso nga ginpasaka batok kay Vilela sadto rason nga indi dapat ini mangin upang sa iya promotion.
Suno kay Pamuspusan, ang mga nasambit nga kontrobersiya ang madugay na nga natabo kag iya man nakita ang maayo nga performance ni Vilela bilang isa ka pulis.
Suno kay Pamuspusan, istrikto ang screening nga ginpatigayon sang Philippine National Police headquarters sa pagpili sa mga ginapromote nga pulis.
Bilang PNP official, ginpahayag sang natungdan nga kilala niya personal si Vilela rason nga siya mismo ang makagarantiya nga isa ka maayo nga pulis ang bag-o nga IPPO Director.
Nahibalu-an nga si Vilela ang nagtal-os kay Police Col. Marlon Tayaba nga nagaserbe na subong bilang chief directorial staff sang Police Regional Office 6.
