ILOILO CITY-Emosyonal nga ginbaton sang pamilya sang mga napatay sa Iloilo Strait tragedy ang financial assistance nga ginhatag sang OVY Foundation ni Donya Olivia Villaflores Yanson kag CERES Liner sa diin nangin palaagyang ang Bombo Radyo Iloilo.
Sa interview sang Bombo Radyo Iloilo kay Lindy Adelantado, utod sang napatay nga si Lynlyn Janolino nga isa ka manunudlo sa Lambunao National High School, iya ginpahayag nga dako nga kadulaan si Lynlyn sa ila pamilya bangud ini ang nagatindog nga breadwinner kag nagasuporta sa ila.
Suno kay Adelantado, dako nga bulig ang nasambit nga financial assistance para sa gasto sa haya kag lubong sang iya manghod.
Magluwas sa pamilya ni Janolino, personal man nga nagpadulong sa himpilan ng Bombo Radyo Iloilo ang iban pa nga pamilya sang mga napatay agud batunon ang bulig.
Nagpain ang nasambit nga foundation kag ang bus company sang 310,000 pesos para sa pamilya sang 31 ka mga biktima kun sa diin P10,000 ang ginbaton sang kada pamilya.
Nahibaluan nga ginpili sang OVY Foundation kag Ceres Liner ang Bombo Radyo bangud napat-ud nila nga madasig, kompleto kag direkta nga mabaton sang mga nalisdan nga pamilya sang mga biktima ang financial assistance kag bangud man sa ila pagsalig sa Bombo Radyo sa patag sang public service.
