ILOILO CITY – Ginahingyo ni Iloilo City Police Office Director Police Col. Martin Defensor Jr. ang pagsakdag sang Iloilo City Council sa iya ginaduso nga pagdeklarar sa mga miyembro sang Communist Party of the Philippines-New People’s Army (CPP-NPA) nga persona non grata.
Ini ang kasunod sang pagpadala sang sulat ni Defensor kay Iloilo City Mayor Jerry Treñas nga nagahingyo nga ideklarar nga persona non grata ang rebelde nga grupo.
Sa interview sang Bombo Radyo kay Defensor, iya ginpahayag nga kun tani, suportahan sang konseho ang iya plano.
Suno kay Defensor, bisan nga wala sang presensya sang rebelde nga grupo sa syudad sang Iloilo apang indi man mahinago nga may yara sang presensya sang cause oriented groups.
Ang mga cause oriented group suno kay Defensor ang nagaserbe nga supporter sang rebelde nga grupo kag nagahaylo sa mga estudyante nga magpakigbahin sa hublag protesta.
Sa pagkamatuod suno kay Defensor, mas makapaayo kun ang syudad sang Iloilo kun tani ang nagpanguna sa mga lugar sa Iloilo sa pagdeklarar sa rebelde nga grupo nga persona non grata.
Nahibalu-an nga sang nagligad nga bulan sang Mayo, ginduso ni Defensor sa Iloilo City Council ang tuhoy diri apang wala ini ginpaboran sang outgoing nga set sang elected officials.
