GUIMARAS – ‘Miscommunication’ ang rason kun nga-a wala nakatambong si anay Philippine Coast Guard Iloilo Station Commander Perlita Cinco sa ginpatigayon nga Legislative Inquiry sa Guimaras.
Ini ang may kaangtanan sa natabo nga Iloilo Strait tragedy sa diin 31 ang patay.
Sa interview sang Bombo Radyo kay Guimaras Vice Gov. John Edward Gando, iya ginpahayag nga nagpakigsapol sa iya kahapon nga adlaw ang pila ka personnel sang Philippine Coast Guard lakip na si Cinco.
Santo sa pagpaathag ni Cinco, nakabaton sang imbitasyon si Commodore Allan Victor Dela Vega, commander sang Philippine Coast Guard Western Visayas, tuhoy sa patigayunon nga Legislative Inquiry.
Suno kay Cinco, nakamuno pa sa iya si Dela Vega nga siya na lang ang magatambong apang lipod sa iya ihibalo, dungan nga ginpatigayon ang Legislative Inquiry sa probinsya sang Guimaras kag sa syudad sang Iloilo.
Ginpahayag ni Gando nga indi man niya mabasol kun may yara sang ‘miscommunication’ nga natabo apang ang maathag lang amo nga wala na sang ikaduha nga hugnat ang Legislative Inquiry para hatagan sang pabor ang Philippine Coast Guard.
