ILOILO CITY – Ginkalipay sang mga barangay official sa probinsya sang Iloilo ang ginaduso nga pagpataas sang honorarium.
Kadungan sang Liga Day 2019 nga ginpatigayon sa Iloilo Sports Complex, ginpahayag ni Department of Interior and Local Government Undersecretary Martin Diño nga dapat na nga ipasar ang Magna Carta for Barangay nga nagahatag sang fixed compensation kag benefits sa barangay officials kag barangay workers.
Mas makapaayo suno kay Diño kun ang honorarium nga ginabaton sang mga Punong Barangay kag Barangay Kagawad ang kasubong man sa ginabaton nga benepisyo sang mga Sanguniang Bayan Member.
Magluwas diri, ginpasalig ni Diño nga daku ang posibilidad nga ipaiway sa 2022 ang Barangay and Sanguniang Kabataan elections.
Linibo ka barangay officials gikan sa 42 ka banwa kag 1 ka component city sa probinsya sang Iloilo ang nagtambong sa nasambit nga kahiwatan.
Nahibalu-an nga sa ginduso nga Senate Bill 136, nakasaad nga ang barangay officials ang makabaton sang fixed salaries, allowances, insurance, medical kag dental coverages, retirement kag iban pa nga benepisyo kasubong sa mga regular government employees.
