ILOILO CITY – Pagpangamuyo ang ginsandigan sang pamilya Lintorio agud nga maluwas gikan sa ginapahayag paka-posses sang malain nga espirito sa Brgy. Tacas, Jaro, Iloilo City.
Ini matapos nga 3 ka pamilya sa nasambit nga
lugar ang ginsudlan sang malain nga espirito matapos ang pagtapas ni certain Kanor sang isa ka kahoy sa compund sa diin naga-istar ang mga biktima.
Sa interview sang Bombo Radyo kay Erwin Lintorio, 51, iya ginpahayag nga ini ang labing una nga kahigayunan nga may natabo nga makatilingalahan sa sulod sang 23 ka tuig nila nga pag-istar sa lugar.
Suno kay Erwin, mismo ang iya 19 anyos nga anak nga si Eljun ang nakakita sang makatilingalahan nga tinuga.
Ginpahayag ni Erwin sang mga nakaligad nga inadlaw, ang iya utod kag mga hinablos ang ginsudlan sang mala-in nga espirito.
Bisan siya suno sa natungdan ang nakakita man sang mga tinuga nga indi kinaandan.
Ginpahayag ni Erwin nga paagi sa pagpangamuyo, naumpawan sila tanan.
Samtang, suno naman kay Eljun Lintorio, mga dalagku kag itom nga tawo ang iya nakita.
Ang iban sa mga tinuga suno kay Eljun ang nagakadlaw, ang iban ang nagakabit sa balayan sang balay samtang ang iban naman ang nagabutong sa iya.
Sang amo nga tion suno kay Eljun, kasubong nga nadulaan siya sang kusog apang pilit nga nagabato.
Ginpahayag sang natungdan nga lipod sa iya ihibalo, nadulaan na siya sang pangalibutan sulod sang pila ka minutos.
Nahibaluan nga sa mga nakaligad nga adlaw, ginapahayag nga ginsudlan sang taglugar ang mga katapo sang pamilya Lintorio, Sabidalas kag Jaranilla.
