ILOILO CITY – Wala na sang iban nga bulong agud nga mangin hilway gikan sa malain nga espirito kundi ang pagpangamuyo kag ang pagsalig sa Ginuo.
Ini ang panugyan sang isa ka youth pastor nga si Peter John Prado sang Antioch Christian Church kag Presidente sang Agape Christian Ministry International, kasunod sang asud-asud nga hitabo sang ginapahayag pagsulod sang malain nga espirito sa isa ka pamilya sa distrito sang Jaro kag sa mga estudyante sa distrito sang Molo.
Sa interview sang Bombo Radyo kay Pastor Prado, iya ginpahayag nga sa iya personal nga pagpati, matuod nga ginsudlan sang mala-in nga espirito ang mga biktima.
Suno kay Pastor Prado, ang isa sa mga estudyante sang Iloilo City National High School ang nabati-an pa niya nga naglain ang tingog.
Ginpahayag ni Pastor Prado nga ang pagbatyag sang tuman nga kasubo, kaakig, kahadlok ukon pagdumot ang mahimo nga gamiton sang yawa sa pag-possess sa isa ka tawo.
Ginhalimbawa sang youth pastor ang istorya sa puno sang sambag sa Iloilo City National High School sa diin may yara sang nakita nga bata nga nagabitay kag nagapangayo sang hustisya sa iya kamatayon.
Ang nasambit nga istorya suno sa natungdan ang nagtuga sang kahadlok sa mga estduyante rason nga mahapos sila nga ginsudlan sang malain nga espirito.
Nagapati man si Pastor Prado nga indi ang kalag sang bata ukon sang iya pamilya ang nagsulod sa mga biktima kundi ang yawa mismo nga naghingalit sa kahinaan sang mga estudyante.
Magluwas sa mahina nga pagpati sa Ginuo, isa man sa mga rason kun nga-a nagakatabo ang demonic possession amo ang pagbatyag sang problema sa diin kalabanan sa mga nabiktima amo ang mga pamatan-on.
