ILOILO– Mahinay kag indi tayuyon ang pagpatuman sang waste segregation sa Material Recovery Facility sang tagsa ka Local Government Unit sa Western Visayas.
Sa interview sang Bombo Radyo kay Mr. Vicente Losbañes, ang pinuno sang Solid Waste Management Division sang Department of Environment and Natural Resources- Environmental Management Bureau 6, iya ginpahayag nga wala napatuman sang maayo ang pagdumala sang Material Recovery Facilities kag indi sa gihapon organisado ang paghaboy sang mga basura.
Suno kay Losbañes, may yara sang mga nakalinya nga programa ang ila talatapan kun sa diin magapa-idalom sa nagkalain-lain nga seminar kag paghanas ang mga Local Government Unit officials tuhoy sa waste segregation kag solid waste management.
Ginpahayag man ni Losbañes nga na una na nga ginpatigayon ang Ecological Solid Waste Summit sang Hulyo 3 tubtob 4 subong nga tuig nga gintambungan sang mga barangay kag sanguniang bayan officials.
Sa Setyembre 2, ginpahayag sang natungdan nga patigayunon naman ang Enhancement Seminar samtang sa bulan naman sang Nobyrembre patigayunon ang Solid Waste Management Summit.
Nagalaum si Losbañes nga paagi sa mga nasambit nga programa, mapatuman na sang husto ang paggamit sang Material Recovery Facility.
