ILOILO– Nagdugo ang natuo nga kilay sang isa ka manugbaligya sa Iloilo Terminal Market matapos gintapungol sang isa ka personnel sang Public Safety and Transportation Management Office kadungan sang ginpatigayon nga Oplan Hawan sa nasambit nga merkado.
Ang manugbaligya ang ginkilala nga si Edgar Lebrilla samtang ang personnel naman sang Public Safety and Transportation Management Office amo si Mikel Rey Espinosa.
Sa interview sang Bombo Radyo kay Mina Lebrilla, tiayon ni Edgar, iya ginpahayag nga kuhaon kun tani sang Oplan Hawan team ang kariton nga yara sa saguwa sang ila baligyaan apang ginpunggan sang iya nga bana.
Suno kay Lebrilla, mangayo sila kun tani sang resibo sa Public Safety and Transportation Management Office agud indi na sila magkadto sa Motorpool kun kuhaon gid man nila ang kariton.
Nakibot na lang sila suno kay Lebrilla sang gintapungol ni Espinosa ang iya nga bana nga naigo sa natuo nga kilay.
Bangud man sa kaakig suno kay Lebrilla, nagkuha sang kutsilyo ang iya bana agud balusan kun tani si Espinosa apang wala na sila nag-abtanay nga duha.
Samtang, depensa naman ni Espinosa, iya lang nga ginpangapinan ang iya kaugalingon matapos nga ginsumbag ni Lebrilla.
