ILOILO– Ginatan-aw nga rason sang nagluntad nga baha sa pila ka barangay sa Syudad sang Iloilo kagab-i amo ang mga barado nga drainage.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakig-angot na siya sa Department of Public Works and Highways agud tsekyaron kun ano ang mga posible lihok nga mahimo sang city government.
Suno sa alkalde, pila sa mga ginatan-aw nila nga solusyon amo ang pag-declog sang mga barado nga drainage kag ang pagpatukod sang mga dugang pa gid nga drainage sa pila ka mga dalanon sa syudad kun sa diin masami nga nagabaha.
Dugang sang natungdan, may yara naman sang pila ka mga proposed pumping stations nga nakatalana nga ipatukod.
Gintudlo sang alkalde nga isa sa pinaka epektibo nga solusyon amo ang dugang nga mga pumping stations bangud suno sa iya mas madasig ini magsuyop sang tubig.
Sa subong, suno sa alkalde ginatinghuaan na nga ipatuman ang mga nasambit nga plano agud ma hagan-hagan ang masami nga pagbaha sa syudad sang Iloilo.
Samtang may kaangtanan naman sa nagluntad nga baha sa pila ka mga barangay sa syudad, ginpahayag ni Iloilo City Mayor Jerry Treñas nga gilayon sila nga nakig-angot sa City Social Welfare and Development Office agud mahibaluan ang mga apektado nga barangay.
Suno sa alkalde, sa bulig man sang City Social Welfare and Development Office kag Public Safety and Transportation Management Office napanghatag na ang bulig nga kinahanglan sang mga residente nga nag evacuate kag apektado sang nagluntad nga baha.
