MANILA – Ginsabat ni anay Sen. Mar Roxas si anay Sen. Juan Ponce Enrile may kaangtanan sa plano nga pagdumili sa iya nga magpadalagan sa ano man nga posisyon sa gobyerno.
Sa interview sang Bombo Radyo kay Roxas, iya ginpahayag nga si Enrile ang nagakadapat nga indi pagtugutan nga magpadalagan ukon magpungko sa ano man nga posisyon sa gobyerno bangud sa malain nga record.
Suno kay Roxas, may kaso nga plunder si Enrile kag nakaguwa lang sa presuhan bangud sa pagpakuno-kuno nga may balatian paagi sa pagpungko sa wheelchair nga naandan na nga ubrahon sang mga pulitiko nga nagapangatubang sang kaso.
Madumduman nga ginpahayag ni Enrile nga si Roxas nga anay Secretary sang Department of Interior and Local Government kag Sen. Leila De Lima nga anay Secretary sang Department of Justice ang nagakadapat nga basulon sa pagsalangisag sa provision sang Republic Act 10592 ukon ang Good Conduct Time Allowance Law.
Maathag suno kay Enrile nga unconstitutional, non-existent kag void ab initio ang implementing rules and regulations ukon ang IRR sang RA 10592 nga ginpirmahan nanday Roxas kag De Lima.
