ILOILO CITY – Pilas sa ulo ang naangkon sang 20-anyos nga babayi matapos nabungguan sang motorsiklo sa Brgy. Rizal, La Paz, Iloilo City.
Ang biktima ang ginkilala kay Jesibel Dela Cruz Paniagua sang Brgy. Manggona, Cabatuan, Iloilo samtang ang driver naman sang motorsiklo ang ginkilala kay Rolly Maigue, 42, sang Brgy. Merced, Banate, Iloilo.
Sa interview sang Bombo Radyo Maigue, iya ginpahayag nga indi madasig ang iya pagpadalagan sang motorsiklo apang nalab-ot gid sang manibela ang biktima.
Suno kay Maigue, wala siya sang intensyon nga palagyuhan ang biktima kag handa man nga maghatag sang bulig sa pamilya.
Suno kay Police Chief Master Sergeant Ariel Lonagres, duty investigator sang La Paz Police Station, hulaton pa ang pamilya sang biktima kun bala magapasaka sila sang kaso.
Nagapabilin sa West Visayas State University Medical Center ang biktima samtang arestado naman ang status sang driver.
